تقرير كامل عن منتج “جوّنا بطاطس”  لمطعم  شاورمر

تقرير كامل عن منتج “جوّنا بطاطس”  لمطعم  شاورمر

- ‎فيأخبار, تقارير

السلام عليكم

 

يمكن تكون هذي أول مشاركة لي مع موقع الذواقة واللي أتوقع له مستقبل ممتاز في عالم هواة الأكل والمطاعم بعد ما حقق نجاح باهر في انستقرام. الموضوع هذا بيكون حصري  في موقع الذواقة.

 

اليوم جتنا دعوة من سلسلة مطاعم شاورمر الشهيرة لمشاركتهم في حدث سموه “جوّنا بطاطس… وأنت وش جوّك؟” Photo Sep 14, 10 20 53 PM

 

خلوني أبدأ بمعلومة مهمة قبل لا أتكلم عن الحدث. واللي أحب أقوله هو رأيي الشخصي في سلسلة مطاعم شاورمر و تحديداً منتجهم الرئيسي الشاورما. شاورمر في رأيي غيّر الطريقة اللي نشوف فيها الشاورما. وخلق براند جميل و ستاندرد جميل للنظافة في المطاعم على غير عادة مطاعم الشاورما تحديدا.

وأنا اختلف مع من يقول أنه غيّر الشاورما لتكون وجبة سريعه فهي من عمرها وجبه سريعة ولا تحتاج تكون أسرع بل من جرب يزور فروع شاورمر هذي الأيام بيعرف أنه ممكن ينتظر وجبته عندهم أكثر من انتظاره عند مطعم زي ماما نورة بالرياض (إذا لقى موقف بكل الأحوال )

 

أما بالنسبة للشاورما فرأيي بسيط! شاورمتهم تفتقر لشغلة أساسية في أي شاورما وأي وجبة  وهي الحرارة. وهنا أتكلم عن الشاورما  أول ما تتصلح وتتسلم لك من يد المعلم تكون باردة. لسببين سهله، أول شي يستخدمون خبز تورتيا بارد + خس بارد + صوص بارد. والسبب الثاني أنهم ما يحطون دجاج كافي فكل الأشياء اللي قبل تجعل برودتها على الدجاج وتصير كلها باردة.

 

لكن دائماً  كان عندي شغله تخليني أرجع لشاورمر مع أن الشاورما  في رأيي ليست أفضل شاورما. واللي هي البطاطس الحارة. اللي ما يعرف البطاطس الحارة راح اشرح عنها: عبارة عن مكعبات بطاطس مقلية عليها صوص حار و ثوم و كزبرة مع دجاج شاورما.

 

هذا الطبق عندهم بالنسبه لي أسطوري ولذيذ كفاية إني أرجع لهم ليس بحثاً عن الشاورما بل البطاطس الحارّة. ومن حظي اليوم أن الحدث كامل كان عن البطاطس الحارّة،وفرحتي اليوم لا توصف.

 

بعد كلامي مع مدير التسويق في شاورمر وضح لي أنهم لاحظو تميز البطاطس الحارة عندهم و كثرة الإقبال عليه فقررو أنهم يستثمرون أكثر في هذا المنتج. وأنا بالطبع أتفق معه وأشوف أنها خطوة ممتازة. فقررو أنهم يطرحون أربع انواع جديدة من البطاطس الحارة بالإضافة للنوع الأصلي (ما مجموعه خمسة انواع).

 

طبعا لهم الشكر في الدعوة أولاً ولاتاحة الفرصة لي إني أجرب الأنواع الخمسة كلها قبل الطرح وأخذ رأيي كأحد المهتمين في الأكل والمطاعم بشكل عام. راح أشرح لكم كل نوع من البطاطس الحارة و إن شاء الله تعجبكم:

 

  1. بطاطس حارّة الأصلية: واللي هي مثل ما ذكرت قبل عبارة عن مكعبات بطاطس مقلية مع صوص حار و ثوم وكزبرة مع دجاج شاورما. هذي من زمان وانا اشوفها مميزة ولذيذة و نكهتها قوية و واضحة. انا شخصيا هي المفضلة عندي وانصح بتجربتها. Photo Sep 14, 10 26 08 PM
  2. بطاطس حارّة بالجبنة وصلصة الطماطم: واللي هي عبارة عن مكعبات بطاطس مقلية مع صوص طماط مالح و جبنة مالحة ودجاج شاورما. للأسف بالنسبة لي كان طعمها ونكهاتها اكثر من اللازم. مالحة و الجبنة فيها مغطية على باقي النكهات لدرجة اني معد ادري وش قاعد اكل. ما انصح فيها مره.Photo Sep 14, 10 22 14 PM
  3. بطاطس حارّة بالطحينة و دبس الرمان: هذا منتج المفروض يفتخرون فيه 🙂 فعلا ابدعو فيه. مكعبات بطاطس مقلية مع دبس رمان و صحينة ويظهر لي ان فيه ثوم خفيف و دجاج شاورما. شي فاااخر وانصح بتجربته.Photo Sep 14, 10 23 19 PM
  4. بطاطس حرة بالكاري و الصلصة الحارة: للأسف لا يمت لإسمه بصلة ولا اتوقع انه منتج بيستمر. انا من الناس اللي يحبون الكاري و برضو من عشاق التوابل الحارة. ولكن ما اشوف انهم ضبطو الخلطة. تكلمت مع الشيف عن الصوص وكانت نصيحتي انهم يمزجون الكاري مع كريم الطبخ و زبدة وبيحصلون على نكهة حقيقية للكاري. ولاكن ماتوقع ان هالطريقة ممكن تنجح على مستوى سلسلة مطاعم لصعوبة حفض المزيج. عموما لا انصح في تجربة هالنوع.Photo Sep 14, 10 25 08 PM
  5. بطاطس حارّة بالليمون و اكليل الجبل: عبارة عن مكعبات بطاطس مقلية مع صوص الليمون و عشبة اكليل الجبل ودجاج شاورما. النوع هذا لذيذ لكن خفيف النكهات. لا الليمون معطي حموضة ولا ريحة قوية ولا اكليل الجبل وانا من عشاقه كان بنكهة واضحة. تكلمت مع الشيف انهم يرفعون من حدة النكهات ولكن اوضح لي بانهم كانو يقصدون ان يكون فيه نكهة خفيفة من بين النكهات الخمسة للناس اللي تبي شي هادئ. موب شين بس ودي اعصر عليه ليمونه زيادة 🙂 Photo Sep 14, 10 24 14 PM

الأنواع هذي كلها بتكون متوفرة في جميع فروع شاورمر ابتداء من غدا ان شاء الله واتمنى لكم تجربة طيبة.

Photo Sep 14, 10 33 55 PM

بالنسبة لي كانت تجربة جميلة وخلالها حصلت لي الفرصة اني اقابل فريق الجودة و الشيف اللي وراء كل منتجات سلسلة مطاعم شاورمر. بالإضافة الى انه حصل لي فرصة البوح بما في قلبي اتجاه برودة الشاورما عندهم واللي استقبلوها بكل صدر رحب.

Photo Sep 14, 10 41 29 PM

ان شاء الله تعجبكم التغطية وبامكانكم تتابعون تجاربي للأكل في حسابي في الانسقرام @mhudaib

اترك رد