تقييم مطعم أسماك باعشن – جدة

تقييم مطعم أسماك باعشن – جدة

- ‎فيتقارير
@أحمد مساوى

تقييم مطعم أسماك باعشن – جدة

باعشن للأسماك

تقييم أحمد مساوى

عنوانه: سوق الندى ، وسط البلد

مين فيكم ما يعرف أسماك باعشن ؟

أتوقع جيل الطيبين حقين جدة يعرفوه مضبوووووط .
يعتبر مطعم باعشن للأسماك أحد أقدم المطاعم القائمة في جدة ، وحاولت أوصل لتاريخ محدد لكن العمالة اللي في المطعم حرصو على عدم تواصلي مع أصحاب المطعم الحقيقيين ، وياريت لو فيه أحد منكم يقدر يساعدني ويوصلني بأصحاب المطعم أو أقاربهم عشان أسجل تاريخ المطعم أكون لكم من الشاكرين .
المطعم شعبي حتى النخاع ، بكل بساطة تدخل المطعم وتختار الأسماك من الثلاجة والجمبري اذا حبيت ويتبلوه بتتبيلتهن الخاصة ويقلوه ويرشو عليه رشة بهارات وعيش يا معلم .

عندهم جلسات أرضية في الدور العلوي في غرف بيت شعبي ، ويقدمو مع الطلبات عيش ناشف ، وبصل أخضر وجرجير وليمون وسلطات طحينة وحُمر (وعندهم رز ابيض وصيادية بس أنصحكم تكتفو بالعيش والتوابع) .

حلاوة هذا المطعم لما نطلع مجموعة شباب ونتغدى عندهم في الجلسات الشعبية الجميلة ، نحس كأننا سافرنا عبر الزمن من خلال هذا المطعم ، وعن نفسي أتذكر بيت جدتي الله يرحمها والجلسات الأرضية من طُراحات ومساند .

المهم دايماً نزور المطعم وتقييمه كالتالي:

 

هامور مقلي

١- سمك ” هامور مقلي “.

التقييم ١٠/٧

الوصف: النكهات في البهارات المستخدمة مترابطة مع السمك وتبرز الطعم ، لكن عندهم اختلاف في مستوى القلي نفسه وآخر مرة كان مقلي أكثر من اللازم ووصل لحد انه ينشف.

٢- طبق ” جمبري مقلي “.

تقييم مطعم أسماك باعشن – جدة ١٠/٨.

الوصف: أحد أفضل المطاعم اللي تعمل تتبيلة جمبري مقلي ، وسواه عادة أفضل من سواء السمك ، والجمبري طازج وحجمه متوسط عادة.
سلطة الحُمر حموضتها مناسبة وقوامها خفيف.
سلطة الطحينة خفيفة جداً (موية بنكهة الطحينة) زي ما تعودنا في المطاعم الشعبية.

متوسط السعر للشخص = ٥٠ إلى ١٠٠ ريال.

إيجابيات:
١- عراقة المكان.

سلبيات:
١- عدم التحكم في مستوى القلي.
٢- اختلاف المستوى عبر زيارات متعددة.
التقييم العام = ١٠/٧
أتمنى ان أصحاب المطعم يضبطو ويطوروا في العمالة والمستوى العام عشان يحافظوا على عراقة أحد أقدم المطاعم القائمة في جدة

من هنا ستجد تقييم المزيد  من مطاعم جدة

المصدر ahmadmesawa
كاتب وناقد طعام

عضو: “رابطة صحفيي الطعام” الأمريكية

كاتب في مجلة “ديستينيشن جدة”

اترك رد