تقييم مطعم طشة – الشيخ زايد مصر

تقييم مطعم طشة – الشيخ زايد مصر

- ‎فيتقارير
@أحمد مساوى

تقييم مطعم طشة – الشيخ زايد مصر

مطعم طشة

 

العنوان: أمريكانا مول ، محور ٢٦ يوليو ، الشيخ زايد.

في البداية حاب أوضح نقطة ، المصريين على الرغم من انهم عايشين في بلد سياحي الا انه من الصعب انك تلاقي مطعم يقدم أكلات مصرية حقت البيوت في المطاعم ، واللي أكل في بيوت المصريين في مصر يفهم قصدي مضبوط خاصة من ناحية التسبيك ، وصحيح انه فيه مطاعم تقدم أكل مصري من طواجن وايدامات وبعضها قديم لكن غالباً تكون نكهاتها “سياحية” يعني من الآخر لا توازي أكل البُيُوت وأقوى مثال لهذي المطاعم السياحية مطعم “أبو السيد” .

مطعمنا اليوم أحد المطاعم السياحية بس لسه ما أنتشر بقوة زي أبو السييد لأنه لسه جديد نسبياً مقارنة بالمطاعم القديمة اللي تتجاوز أعمارها عشرات السنين ، وفيه عنده طلبات يتميز بها وطلبات أقل من عادية زي المطاعم الثانية ، ويتلخص دور مواضيعي للإشارة لأفضل الأطباق والأطباق اللي المفروض نتجنبها.

موقع هذا المطعم في سنتر متواري نسبياً اسمه “أمريكانا بلازا” وعلى الرغم من كثرة المطاعم فيه الا أن السنتر يستهدف أهل المنطقة أكثر من استهدافه للسياح ، وعشان كده كثير من السياح ما يعرفو هذا السنتر ولا مطاعمه.

مطعم “طشة” معناها الطشة اللي يتم وضعها على وش الملوخية كمرحلة أخيرة لإضفاء نكهة التسبيك قبل تقديمها ، وتكون عادة تقلية توم ، وراح نشوف ايش الميزة في المطعم هذا.

عيش بلدي

زي كثير من المطاعم يقدمو ضيافة صغيرة في البداية عادة ، ولاحظو اني قلتها قبل كدة وأستمر بذكر نفس المعلومه انه (مافي مطعم كامل يقدم أطباق لذيذة بالكامل) لكن فيه مطاعم تتفوق في عدد الأطباق اللذيذة على حساب الأطباق الأقل من عادية .
ونبدأ التقييم:

١- مقبلات ” جبنة قديمة “.

السعر: ضيافة.

التقييم: 10/3.

الوصف: جبنة قديمة فعلاً زي ماهو واضح من اسمها ، وهذي حركة أرياف مصر ، والجبنة القديمة تناسب الذوق المصري الشعبي وما تناسب الأجيال الجديدة من المصريين والسياح عموماً بسبب انها جبنة طعمها حاد وريحتها قوية ، علماً اني أحب الأجبان الحادة لكن تقييمي المنخفض لهذا الصنف بسبب عدم تناسبه كصنف ضيافة في مطعم كبير يستهدف شريحة سنية غالبيتهم لا يحبون الجبنة القديمة ، وهذا من أصول التقييم الإحترافي (التوافق مع الذوق العام وليس الذوق الشخصي) .

٢- خبز ” عيش بلدي “.

السعر: ضيافة.

التقييم: 10/6.

الوصف: عادي جداً ومافيه ميزة ، وتمنيت انه يكون ساخن على الأقل.

 

مطعم طشة


المطعم يعتمد بصورة كبيرة على الإستعراض في التقديم ، مثلاً لما تطلب موية يجيبلك القُلة اللي في الصورة ويفتح قزازة المية قدامك ويصبها في الجرة ويخليها ، وهذي الحركة تحافظ على درجة برودة الموية فعلاً من واقع تجربة ومن واقع خبرة القدامى ، وهذي الحركة راح يكون لها تأثير في النتيجة النهاية للتقييم.

شوربة لسان العصفور

١- شوربة ” لسان العصفور “.

السعر: 25 جنيه.

التقييم: 10/7.

الوصف: نكهات موزونة وبمرق الدجاج وضايفين عليها جزر وهذي اضافة ذكية وممتعة وتعطي قوام اضافي للشوربة ، وقوام لسان العصفور طري شوية زيادة ، ملوحتها متوازنة وهذي ميزة في مطاعم مصر عموماً .

 

مقبلات
١- مقبلات ” بابا غنوج ” (اللي نسميه في السعودية متبل يسموه في مصر بابا غنوج ، والعكس صحيح وفي الوصف تحت راح أتعامل معاه انه متبل طالما ان غالبية الجمهور سعوديين).

السعر: 18 جنيه.

التقييم: 10/7.

الوصف: المتبل عادة المفروض يكون طحينة وباذنجان ، والبابا غنوج لا يحتوي على طحينة ، وهذا المتبل فيه كمية باذنجان كبيرة تعطي احساس انه رايح على بابا غنوج ، والقوام ثقيل لأنه غير مهروس تماماً ، يعني تلاقي معاك قطع باذنجان ، فيها نكهة تحمير الباذنجان بوضوح بسبب كميته ، والطحينة المصرية مكملة للطعم اللذيذ للمتبل .

٢- مقبلات ” بصارة “.

السعر: 18 جنيه.

التقييم: 10/7.

الوصف: البصارة عبارة عن فول أبيض مدشوش في الأساس ، و يُضاف عليها ورقيات خضراء مختلفة عشان اللون والنكهات (تختلف نوعيتها من بيت لآخر) وتتزين بكشنة بصل وتتقدم باردة ، وهذي البصارة قوامها مخشن شوية وتحتاج انها تكون أنعم وبقوام كريمي زيادة شوية ، ونكهة الكزبرة والبهارات واضحة وتعطي احساس بالانتعاش ، وتقلية البصل مناسبة وتعطي حلاوة خفيفة للطبق اجمالاً وترفع من مستواه بنكهة اضافية.

٣- مقبلات ” رقاق باللحمة “.

السعر: 35 جنيه.

التقييم: 10/6.

الوصف: اللحمة نظيفة و مليانة بهارات ، والرقاق المفروض يكون طبقات من العجينة الخفيفة تتخللها اللحمة المفرومة ، لكنهم عاملينه بطريقة حشوة اللحمة ومن برة عجينة وهذا غير في قوام الرقاق وصارت اللحمة متكتلة وفقدت احساس الرقاق الصح ، والعجينة نفسها غير متساوية لأنه في منطقة يجيك كمية حشوة متناسبة وفي منطقة تاكل عجينة ? نكهات لذيذة لكن تطبيق خاطئ.

الفيديو يشرح معنى كلمة “طشة” بالضبط .

الطشة هي الخلطة دي اللي شايفينها واللي تحطي نكهة التسبيك عادة للملوخية ، وكمان يحطوها على فتة الكوارع وعلى الأغلب على أي أطباق فيها كشنة ثوم.

كنت ابغا أحطلكم مقطع طشة الملوخية لكن طشتها كانت باردة ومافيها صوت السيزلنج اللي سامعينه هنا.

وسموها طشة لأنها تطش بسبب ملامسة عنصر ساخن جداً مع عنصر أبرد منه (قريبة من تنقيط الموية مثلاً في الزيت الحار أو العكس ، بس لاحد يعمل حركة الموية والزيت لحسن تولعو حريقة).

ملوخية بالدجاج
١- طبق رئيسي ” ملوخية بالدجاج“.

السعر: 60 جنيه.

التقييم: 10/7,5.

الوصف: في البداية لازم أنبه على نقطة ، سمعت أراء متناقضة جداً عن الملوخية في المطعم هذا ، فيه اللي يمدحوها وفيه اللي يذموها ، والإستنتاج الطبيعي هو ان المستوى غير ثابت أو ان اللي مدحوها تأثرو بحركة الطشة! وهنا راح أتكلم عن تجربتي الشخصية فقط ، الملوخية قوامها مضبوط وماهي فاصلة وحرارتها معتدلة وعلى الرغم من ان الطشة كانت أبرد من طشة الطبق الثاني الا أن نكهاتها قوية وواضحة ، نكهة التسبيكة (التكشينة) ظاهرة وطعمها مشابه جداً لملوخية البيوت المصرية ، والرز كان رز مصري بالشعيرية وقوامه اوكي بس وكويس انه ماهو مضغوط بقوة في الزبدية او الطاسة ، والدجاج محمر في الزيت لكن وفيه قرمشة خفيفة المشكلة انه مزيت وما أتصفى مضبوط ، وقوامه الداخلي طري عموماً وماهو ناشف.

اللي حصل اننا طلبنا ملوخية بالأرانب ، لكن اللي قدموا لنا ملوخية بالدجاج ، وأعتذروا لما نبهناهم وعرضو انهم يغيروها لكن نبع الحنان الله يحفظها قالت خلاص خليها ، ولا عن نفسي ما عندي لعب يغيرها يعني يغيرها .

فتة كوارع
١- طبق رئيسي ” فتة كوارع “.

السعر: 65 جنيه.

التقييم: 10/2.

الوصف: وتستمر المعاناة في المطاعم المصرية بعدم وجود فتة كوارع مضبوطة صح زي حقت البيوت ، صدقاً فتة الكوارع في مطعم “الدوار المصري” في الرد سي مول في جدة أحسن من كثير من المطاعم اللي في القاهرة ، وهذا أحد هذي المطاعم ، أولاً كمية الرز كبيرة جداً مقارنة بالخبز اللي تحت ، ثانياً الخبز منفوش تماماً لأنه تشرب مرقة بدون ما يعالجو الخبز بطريقة سليمة ، ثالثاً الكوارع نفسها ما كانت كوارع قد ما كانت أطراف الجلد حق الكوارع ، رابعاً حتى أطراف الجلد هذي كانت فتافيت صغيرة وبقايا فيها سواد وعروق وكميتها إجمالاً قليلة جداً مقارنة بالفتة  ، وهذا كله والنكهات في الأخير أقل من عادية،
بصراحة حطمني هذا الطبق وتركته زي ما هو وأعطيته علامة عشان العرض والتقديم فقط.

عناب

١- مشروب ” عِناب ” والشهير عندنا بالكركديه البارد.

السعر: 15 جنيه.

التقييم: 10/7,5.

الوصف: انا حطيت العصير في نفس الترتيب اللي وصلني فيه بعد ما ذكرتهم اني طلبت عناب ، يعني بعد ما خلصنا أكل ولله الحمد ، هذا غير انه قدمه جنب يدي على طرف الطاولة وهذي الحركة تدل على انعدام التدريب والخبرة في الخدمة في المطاعم ، وعلى العموم نكهته فيها حدة بسيطة وواضح انه معمول من أمس (وهذا ماهو غلط في العناب) بس يكون التحكم في حدة النكهة تعتمد على ذوق الشخص المسؤول عنه اللي المفروض يزيد موية وسكر لغاية ما يوصل للعيار الصح ، وهذي شبه مستحيلة الا للشخص المدرب المتمرس في العناب وأذواقه  ، وعلى العموم نكهته معتدلة مائلة للحدة وبارد وكان ممتع ومشابه لنكهة اللي نشربه في البيوت المصرية.
ونخش على الحلى الله يحلي أيامكم .

أم علي
١- حلى ” أم علي “.

السعر: 30 جنيه.

التقييم: 10/6.

الوصف: ام علي عجينتها متوسطة المستوى ومتماسكة وتحتاج زيادة بسيطة للحليب وحلاها متوسط (امي طلبت حلاها خفيف) بس حبات البندق كاملة وتعتبر كبيرة في كل لقمة تحتوي على بندق .

طشة

 

تجربتي في مطعم طشة تضعه في خانة واحدة مع المطاعم السياحية اللي يركزو عادة على الديكور والإستعراض ولا يهتمون كثيراً بالأكل نفسه اللي مفروض يكون راس مالهم .

ديكور جميل وأفكار حلوة وأسم مميز لكن ما راح أتحمس أروح مطعم عشان الجلسات على حساب الأكل نفسه ، والمطعم يصنف من المطاعم المتوسطة في مجال الأكل المصري ، يعني أفضل من البعض وأسوأ من البعض لكنه مميز بمنيو غني بالأكلات المصرية وهذي مسألة قليلة في مصر.

إيجابيات:
١- الديكور.
٢- الأفكار.
٣- الأسعار.
٤- تنوع كبير في المنيو.

سلبيات:
١- الجودة.
٢- الحاجة لتدريب احترافي أو تطبيقه بصورة سليمة.

اجمالي السعر لثلاثة أشخاص وزاد من الأكل = 325 جنيه (يعني حوالي 160 ريال فقط ).

التقييم العام = 10/6.

وأنصح السياح بتجربته لخوض التجربة بنفسهم وخاصة الملوخية وطشتها.

تحياتي،،

من هنا ستجد تقييم المزيد  من  مطاعم مصر

المصدر ahmadmesawa
كاتب وناقد طعام

عضو: “رابطة صحفيي الطعام” الأمريكية

كاتب في مجلة “ديستينيشن جدة”

اترك رد